Arkitekti i rrethit të ngushtë të Ramës zbulon planet për kullën e re në qendër të Tiranës - Arbëria News

Arkitekti i rrethit të ngushtë të Ramës zbulon planet për kullën e re në qendër të Tiranës

Kryeministri Edi Rama ka planifikuar ndërtimin e një kulle tjetër në qendër të Tiranës dhe të paktën ndërtimin e dy resorteve në bregdetin e jugut.

Megjithëse qeveria nuk flet asnjëherë për këto projekte, arkitekti Winy Maas, i studios MVRDV, i njohur në Shqipëri si një prej arkitektëve të rrethit të ngushtë të Kryeministrit Edi Rama, i ka prezantuar këto projekte përpara studentëve gjatë një leksioni të mbajtur në maj 2018.

Projekti i Kullës në Tiranë

Winy Maas shpjegon se në qendër të Tiranës, në krah të Teatrit të Operas dhe Baletit, do të ndërtohet një kullë e lartë në formën e një koke njeriu. Winy Maas ka hartuar projektin pasi i është kërkuar personalisht nga Kryeministri Edi Rama, edhe pse zyrtarisht nuk është hapur asnjë konkurs arkitekture për këtë zonë.

Vetë Mass shprehet:

“Edi më tha: ‘dua të bëj diçka me historinë’. Më tregoi zonën, në qendër, në njërën anë të sheshit të ri të sapo ndërtuar nga belgët.”

“E nisëm me projektin e një kulle të thjeshtë, më pas e modifikuam, me ballkone e tarraca dhe i dhamë formën e një koke njeriu.”

Projektet në bregdet

“Ne bëjmë shumë gjëra dhe përgjatë bregdetit”, vazhdon më tej Winy Maas, duke folur për ndërtimin e një resorti në Palasë dhe një tjetër në Gjipe.

“Në një prej fshatrave përgjatë bregdetit (Palasë), investitori jon rus donte këtë projekt:

“Më pas ne e modifikuam projektin dhe propozuam këtë:

“Investitori rus pyeti ‘ku është resorti im?’ Pikërisht këtë [habitjen e investitorit] donim të arrimin, është më mirë se në çdo film të James Bondit dhe investitori rus e pranoi”, shpjegon Winy Maas.

Nga leksioni i arkitektit nuk kuptohet qartë se kush është investitori rus të cilit i referohet dhe se kur do të nisë zbatimi i këtij projekti në Palasë. Aktualisht në këtë zonë po përfundon një tjetër resort  turistik “Green Coast” – një kompleks vilash dhe apartamentesh me investitor grupin Balfin, i shtrirë në një sipërfaqe prej 185 mijë metrash katrorë.

Më tej Winy Maas tregon se do të ndërtojë një hotel në majë të një kanioni që futet brenda në det në Gjipe:

“Do të vëmë një element argjendi në këtë zonë (Gjipe). Jo hotele të mëdha dhe plazhi do të mbetet publik. Do të jetë si një rreze e stërmadhe me dhoma.”

/Exit.al

You May Also Like

Leave a Reply

Your email address will not be published. Required fields are marked *

2 × 4 =