Gjakmarrja shqiptare, një reportazh nga BBC - Arbëria News

Gjakmarrja shqiptare, një reportazh nga BBC

Nga Çapajev Gjokutaj

Para 2-3 ditësh BBC foli për gjakmarrjen shqiptare. Thoshte se vetëm në rajonin e Shkodrës ka 68 familje të ngujuara. Pastaj shtonte se gjakmarrja sot nuk bëhet sipas kanunit. Ky nuk lejon të marrësh gjak duke vrarë fëmijë dhe gra. Në odat e ngujimit shumica janë fëmijë dhe gra.

Nuk besoj se kemi pritur BBC-në për të kuptuar s ajo që sot e paraqesim si gjakmarrje është një hakmarrje primitive. Bëhet pa rregull e kanun, lehtëson vrasësin dhe shumicën e pasojave ia faturon bashkësisë.

Duket sikur hakmarrjen e egër e quajmë ‘gjakmarrje’ thjesht për forcë zakoni. Në fakt kemi të bëjmë me një qasje hipokrite që buron nga interesa konkrete e meskine.

Krimineli, ai që bën vrasjen, është i interesuar të thotë se vret për gjakmarrje. Qetëson veten dhe justifikohet para të tjerëve: vërtetë vrava, por e bëra për fisin, kanunin, porosinë e të parëve.

Përdorimi i termit ‘gjakmarrje’ shërben edhe për të arritur qëllime praktike. Shumë azilkërkues e përdorin gjakmarrjen si alibi, pretendojnë se kanë rënë në gjak thjesht për të siguruar qendrimin në emigracion.

Mediat jo rallë janë të interesuara që vrasjet për hakmarrje t’i quajnë ‘gjakmarrje’. Vrasja për hakmarrje është një krim gjithsesi i rëndomtë, krahasuar me gjakmarrjen që ka brenda teatër, primitivizëm, ekzotizëm etj. Ekzotizmi bëhet faktor veprues sidomos për mediat e huaja të cilat duket se i thonë lexuesit perëndimor: afër nesh, ka njerëz që jetojnë shekuj larg nesh.

OJF-të tona financohen përgjithësisht nga të huajt. Vëmendja e donatorit mund të tërhiqet më lehtë me dukuri e ngjarje dramatike, tronditëse, që kanë ndikim tragjik tek bashkësia. Gjakmarrja i prezanton të gjitha këto më mirë se sa vrasja për hakmarrje. Të mos flasim pastaj për disa shoqata pajtimi gjaqesh, që kanë shitur dëshmi se ky apo ai është në gjak

Turp, që si shoqëri marrim pjesë në farsa të tilla që sublimojnë vrasjen dhe kriminelët, kurs vuajtjet ia faturojnë bashkësisë dhe, kulmi i kulmeve, vrasin fëmininë e dhjetra krijesave të pafajshme.

You May Also Like

Leave a Reply

Your email address will not be published. Required fields are marked *

16 − nine =