Po Rama pse nuk e jep dorëheqjen si kancelari Kurc? - Arbëria News

Po Rama pse nuk e jep dorëheqjen si kancelari Kurc?

Lajmi i dorëheqjes së kancelarit austriak Sebastian Kurc, pas publikimit të një videoskandali që tregon liderin e partisë së ekstremit të djathtë në koalicionin qeveritar, Shtrahe, të kërkojë donacione ilegale nga një miliarder rus, është përshëndetur gjerësisht si gjest që dëshmon moral të lartë e që mund ta kryejë vetëm një burrë shteti.

Po ashtu janë hequr paralele me kryeministrin e vendit, Ramën, i cili, edhe pse është përballur me shumë më tepër skandale se kancelari austriak, jo vetëm nuk e ka çuar nëpër mend dhënien e dorëheqjes, por as të kërkojë ndjesë për dëmet që i janë shkaktuar interesit publik.

Natyrisht, një kryeministër në qeverinë e të cilit ministrat e brendshëm kapen me kushërinj ose vëllezër që merren me drogë, ose ku ka indicie se ndonjëri prej tyre është marrë edhe vetë me aktivitet kriminal; një kryeministër që, në cilësinë e kryetarit të partisë në pushtet, ka përzgjedhur si kandidatë për bashki dhe deputet individë që janë pjesë audioskandalesh për shitblerje votash; një kryeministër që ka prova se me veprimet dhe mosveprimet e tij i ka shkaktuar shtetit dëme prej qindra milionë eurosh, duhet ta kishte dhënë dorëheqjen prej kohësh.

Kancelari austriak Kurc, u përball me një skandal të qeverisë së tij dhe dha menjëherë dorëheqjen. Kryeministri shqiptar, Rama, është përballur me dhjetëra skandale të qeverisë së tij dhe vazhdon ta mbajë postin. A do të thotë kjo, sikundër shprehen disa analistë, se ndryshe nga Kurci që është burrë shteti, Rama nuk është i tillë? Se ndryshe nga Kurci që ka moral, Rama është i pamoralshëm? Se ndryshe nga Kurci që mendon për interesin publik, Rama mendon vetëm për interesin personal?

A është vërtet kjo arsyeja që Rama nuk e jep dorëheqjen? Ramës mund t’i mungojnë cilësitë e burrit të shtetit, mund t’i mungojë ndjeshmëria morale, mund t’i mungojë edhe shqetësimi për interesin publik; por fakti që ai nuk e ka dhënë dorëheqjen nuk lidhet me to. Mungesa e këtyre cilësive te Rama dhe prania e tyre te Kurci nuk arrin ta shpjegojë refuzimin e dorëheqjes nga i pari dhe dhënien e menjëhershme të saj nga i dyti.

Përtej të gjitha cilësive që i dallojnë, Kurc dhe Rama kanë një të përbashkët të madhe, e cila diktohet nga logjika politike. Si kancelari austriak ashtu dhe kryeministri shqiptar janë politikanë; si të tillë, ata janë mbi të gjitha të interesuar për ta marrë dhe mbajtur pushtetin. Në funksion të këtij qëllimi gjithçka tjetër bëhet mjet: morali, shteti, interesi publik, të gjitha këto janë mjete në sytë e politikanit.

Fakti që logjika politike e marrjes dhe mbajtjes së pushtetit i dikton kancelarit austriak dhënien e dorëheqjes përballë një skandali, nuk dëshmon se Sebastian Kurci është burrë shteti, i moralshëm dhe i shqetësuar për interesin publik, por është tregues se austriakët mbështesin me votë vetëm një kancelar që demonstron me vepra se i respekton këto vlera.

Nga ana tjetër, fakti që logjika politike i dikton kryeministrit shqiptar të mos e japë dorëheqjen përballë dhjetëra skandaleve të qeverisë së tij, më tepër sesa të dëshmojë që Edi Rama nuk është burrë shteti, nuk është i moralshëm dhe nuk është i shqetësuar për interesin publik, është tregues se shqiptarët mbështesin me votë edhe një kryeministër që demonstron me vepra se nuk ka asnjë fije respekti për shtetin, moralin dhe publiken.

 

Klementin Mile

/ Gazeta Liberale/

You May Also Like

Leave a Reply

Your email address will not be published. Required fields are marked *

five + 14 =